ரிலீஸ் அப்டேட்டுடன் வெளியான ‘வலிமை’ மோஷன் போஸ்டர் – அஜித் ரசிகர்கள் உற்சாகம்

0 117

அஜித் நடிப்பில் தற்போது உருவாகி வருகின்ற வலிமை படத்தினை இயக்குனர் எச்.வினோத் இயக்குகிறார். இப்படத்திற்கு யுவன் ஷங்கர் ராஜா இசையமைக்கிறார். போனி கபூர் தயாரிக்கும் இப்படத்தில் அஜித்துக்கு ஜோடியாக பாலிவுட் நடிகை ஹூமா குரேஷியும், வில்லனாக தெலுங்கு நடிகர் கார்த்திகேயாவும் நடித்துள்ளமை குறிப்பிடத்தக்கது.

இப்படத்தின் பெரும்பாலான படப்பிடிப்பு முடிந்துள்ள நிலையில் இன்னும் ஒரு சண்டை காட்சி மட்டுமே எஞ்சியுள்ளதாக படக்குழுவினர் தெரிவித்துள்ளனர். இதனை தற்போது ஐதராபாத்தில் படமாக்கி வருகின்றதாக அறியப்பட்டுள்ளது.

கடந்த 2019 ஆம் ஆண்டு வலிமை படத்தின் தலைப்பு அறிவிக்கப்பட்டதற்கு பின், தல அஜித்தின் இப்படம் குறித்த எந்தவித அதிகாரப்பூர்வ அப்டேட்டும் வெளியாகவில்லை என ரசிகர்கள் மிகுந்த வருத்ததுடன் இருந்தனர்.

வலிமை அப்டேட்டுக்காக ஓராண்டுக்கு மேலாக காத்திருந்த ரசிகர்களுக்கு இன்ப அதிர்ச்சி கொடுக்கும் விதமாக, இன்று வலிமை படத்தின் மோஷன் போஸ்டரை படக்குழுவினர் வெளியிட்டுள்ளனர். எந்தவித முன் அறிவிப்பும் இன்றி வெளியான இந்த மோஷன் போஸ்டருக்கு ரசிகர்களிடையே அமோக வரவேற்பு கிடைத்துள்ளமை குறிப்பிடத்தக்கது.

நடிகர் தல அஜித்தின் மாஸான லுக் மற்றும் யுவன் சங்கர் ராஜாவின் மெர்சலான தீம் மியூசிக் என அஜித் ரசிகர்களை திருப்திபடுத்தும் வகையில் அமைந்துள்ள இப்படத்தின் மோஷன் போஸ்டர் சமூக வலைதளங்களில் வைரலாகி வருகிறது. இந்த மோஷன் போஸ்டரில் வலிமை படம் இந்தாண்டு வெளியாகும் என குறிப்பிடப்பட்டுள்ளமை குறிப்பிடத்தக்கது.