Cinema2Day

‘லவ்’ எனப் பெயரை வைத்துவிட்டு ‘லவ்வே’ இல்லாமல் ஒரு படத்தைக் கொடுத்திருக்கிறார்கள். அழகான ஒரு காதல் கதைக்கு வைக்க வேண்டிய பெயரை ‘கள்ளக் காதல்கள்’ கொண்ட ஒரு படத்திற்கு வைத்து வீணடித்திருக்கிறார்கள்.

2021ல் மலையாளத்தில் வெளிவந்த ‘லவ்’ என்ற திரைப்படத்தை அப்படியே ரீமேக் செய்திருக்கிறார்கள்.

‘புலி முருகன், குரூப்’ உள்ளிட்ட மலையாள டப்பிங் படங்களுக்கு தமிழில் வசனம் எழுதிய ஆர்.பி.பாலா இப்படத்தை இயக்கியிருக்கிறார். முழு படமும் ஒரு அபார்ட்மென்ட் வீட்டுக்குள்ளேயே நகர்கிறது. ஒரு நாடகத்தைப் பார்ப்பது போன்ற உணர்வுதான் வருகிறதே தவிர, படத்தைப் பார்க்கிறோம் என்ற உணர்வு ஏற்படவில்லை.

பணக்கார வீட்டுப் பெண் வாணி போஜன். அவரது அப்பா ராதாரவி சொல்லி பரத்தை சந்தித்து திருமணம் பற்றி பேச வருகிறார். பிசினஸ் ஆரம்பித்து தோற்றுப் போனவர் பரத். அப்பா திடீரென வேண்டாமென்று சொல்லியும் பரத்தைத் திருமணம் செய்து கொள்கிறார் வாணி. ஆனால், இருவரது திருமண வாழ்க்கையும் மகிழ்ச்சியாக இல்லை.

தாய்மை அடைந்த செய்தியை மருத்துவமனையில் உறுதி செய்துவிட்டு வீட்டிற்க வரும் வாணியிடம் சண்டை போட்டு அவரைக் கொன்றும் விடுகிறார் பரத். திடீரென காலிங் பெல் அடிக்க, வாணியின் உடலை பாத்ரூமில் மறைத்து வைக்கிறார்.

பரத்தின் நெருங்கிய நண்பர் விவேக் பிரசன்னா வீட்டிற்குள் வர, மனைவியைக் கொன்ற நிலையில் அடுத்து என்ன செய்வது என யோசிக்கிறார் பரத். இதன் பின் என்ன நடக்கிறது என்பதுதான் படத்தின் மீதிக் கதை.

படம் முழுவதும் வெறுப்பைக் காட்டிக் கொண்டிருக்கும் ஒரு கதாபாத்திரத்தில் பரத். பிசினஸில் தோல்வியடைந்த, வேறு எதையும் சரியாக முயற்சிக்காத பொறுப்பில்லாத ஒரு கணவர்.

படத்தில் அவர் நடித்ததை விட குடித்ததுதான் அதிகமாக இருக்கும். அந்த ‘சரக்கு’ பாட்டில் குடிக்கக் குடிக்கக் குறையாமல் இருக்கிறது. அப்படி ஒரு ‘சரக்கு’ கிடைத்தால் குடிமகன்களுக்கு செலவு குறையும்.

வாணி போஜனுக்கு ஆரம்பத்தில் ஓரிரு காட்சிகள், அதோடு கிளைமாக்சில் மட்டும். மற்ற நேரங்களில் பாத்ரூமில் பிணமாக சுருண்டு கிடக்கிறார். பரத்தின் நெருங்கிய நண்பராக விவேக் பிரசன்னா.

அவரது மனைவியை அவரது நண்பன் ஒருவரே கள்ளக் காதல் புரிகிறார் என பரத் வீட்டில் வந்து புலம்பிக் கொண்டு கூட சேர்ந்து குடிக்கிறார். வேறொருவரின் மனைவியான தனது முன்னாள் காதலியை அழைத்துக் கொண்டு பரத் வீட்டிற்கு வருகிறார் டேனி அனி போப். ஒரு கட்டத்தில் அது வீடா இல்லை ‘லோக்கல்’ லாட்ஜா என யோசிக்க வைக்கிறது.

ஒரே வீட்டை எப்படியாவது விதவிதமான கோணங்களில் காட்ட வேண்டும் என நிறையவே முயன்றிருக்கிறார் ஒளிப்பதிவாளர் முத்தையா. ரோனி ரபேல் பின்னணி இசையும் படத்தைக் காப்பாற்ற முயற்சிக்கவில்லை.

ஒரு படம் என்றால் அதில் ஏதாவது ஒரு விஷயமாவது ரசிக்கும்படி இருந்தால் ரசிகர்களால் கொஞ்சமாவது ரசிக்கப்படும். அப்படி எவ்வளவு தேடினாலும் இந்தப் படத்தில் எதுவும் கிடைக்கவில்லை.

‘காதல்’ என்ற படத்தின் மூலம் ரசிகர்களின் மனதில் ஒரு இடத்தைப் பிடித்த பரத்தின் 50வது படம் இந்த ‘லவ்’. அப்போது வந்த ‘காதல்’ கவர்ந்தது, இப்போது வந்த இந்த ‘லவ்’ கசக்கிறது.

லவ் – அவ்வ்வ்வ்வ்வ்…

இந்திய கிரிக்கெட் அணியின் முன்னாள் கேப்டன் ஆன எம்எஸ் தோனி, திரைப்படத் தயாரிப்புத் துறையில் இறங்கி தனது முதல் தயாரிப்பாக இந்தப் படத்தைக் கொடுத்திருக்கிறார். தமிழில்தான் தனது முதல் தயாரிப்பு இருக்க வேண்டும் என்று நினைத்த தோனிக்கு ஒரு தரமான படத்தைக் கொடுத்து முத்திரை பதித்திருக்கலாம் அறிமுக இயக்குனர் ரமேஷ் தமிழ்மணி. இந்தக் கதை போல எல்லாம் படமாகத் தயாரிக்கலாம் என தோனி அண்ட் கோ நினைத்தால் அவர்கள் உடனடியாக தங்களது எண்ணங்களை மாற்றிக் கொள்ள வேண்டும்.

ஐ.டி. கம்பெனியில் வேலை பார்ப்பவர் ஹரிஷ் கல்யாண். அவருடன் வேலை பார்க்கும் இவானாவைக் காதலிக்கிறார். இரண்டு வருடங்கள் காதலித்த பிறகு திருமணம் செய்து கொள்ள நினைக்கிறார்கள். ஆனால், தனது வருங்கால மாமியாரான நதியாவுடன் பழகிப் பார்த்த பின்புதான் திருமணம் என ஒரு ‘ஐடியா’ கொடுக்கிறார் இவானா. அதனால் ஒரு ‘ட்ரிப்’ போக ஆசைப்படுகிறார்கள்.

அம்மா நதியாவிடம் பொய் சொல்லி ட்ரிப்புக்கு அழைத்துப் போகிறார் ஹரிஷ். இவானா குடும்பத்தினர், தோழி, ஹரிஷ் குடும்பத்து தோழி வினோதினி குடும்பத்தினர், ஹரிஷ் நண்பர் ஆர்ஜே விஜய் ஆகியோரும் ட்ரிப்பில் கலந்து கொள்கிறார்கள். ஒரு கட்டத்தில் நதியாவுக்கு உண்மை தெரிய வர கூர்க் வரை சென்ற பின் ட்ரிப்பை கேன்சல் செய்கிறார்கள். ஆனாலும், நதியா, இவானா திடீரென தனியாகச் செல்கிறோம் என பிரிந்து போகிறார்கள். இதன்பின் என்ன நடக்கிறது என்பதுதான் படத்தின் கதை.

இம்மாதிரியான கதைகளை உளவியல் ரீதியான, கலகலப்பான, சென்டிமென்ட் படமாகக் கொடுத்திருந்தால் ரசிகர்களைக் கவர்ந்திருக்கும். ஆனால், எதிலுமே ஒரு முழுமை இல்லாமல் திரைக்கதை அதன் போக்கில் எங்கெங்கோ போய்க் கொண்டிருக்கிறது. ட்ரிப் போகும் சாலைகளிலாவது திருப்பங்கள் அடிக்கடி வரும். இந்தப் படத்தில் இடைவேளையின் போது வரும் ஒரே ஒரு திருப்பம் தவிர மேடு, பள்ளங்களில் மட்டுமே திரைக்கதை பயணிக்கிறது.

ஹரிஷ் கல்யாண் படம் முழுவதும் எதையோ பறிகொடுத்தவர் போல உம்மென்றே இருக்கிறார். அம்மா நதியா ஒரு பக்கம், காதலி இவானா ஒரு பக்கம் என இரண்டு பக்கமும் மாட்டிக் கொள்பவர்கள் இப்படித்தான் இருப்பார்கள் என நினைத்திருப்பார் போலிருக்கிறது. ஹரிஷ் கல்யாண் இப்படி ஒரு பக்கம் ‘உம்’மென்று இருக்க, இன்னொரு பக்கம் இவானா ‘அய்யே’ என அடிக்கடி அலுத்துக் கொள்கிறார். உங்களுக்கு என்னதான்பா பிரச்சனை என சத்தம் போட்டு கேட்கத் தோன்றுகிறது.

நதியா முகத்தில் அவ்வளவு களைப்பு ஏன் என்று தெரியவில்லை. கண்களுக்குக் கீழே தூக்கமில்லாததால் வரும் சுருக்கம் அவரது தோற்றத்தையே கெடுத்துவிடுகிறது. இடைவேளை வரை அம்மா நதியாவாக இருப்பவர், இடைவேளைக்குப் பின் 80களின் நதியாவாக மாறிவிடுகிறார், ஆடைகளில் மட்டுமே அந்த மாற்றம்.

படத்தில் நடித்தேயாக வேண்டும் என யோகிபாபுவிடம் கேட்டதால் வந்து நடித்துக் கொடுத்திருப்பாரோ ?. திடீரென வந்து திடீரென காணாமல் போய் மீண்டும் திடீரென வந்து போகிறார், சிரிக்க வைக்காமல்… . ஹரிஷ் கல்யாணின் நண்பனாக ஆர்ஜே விஜய். ஒரு சில வசனங்களில் மட்டும் கலகலப்பூட்டுகிறார்.

படத்தின் இயக்குனர் ரமேஷ் தமிழ்மணியே படத்திற்கு இசையமைத்திருக்கிறார். காட்சிகளில் ஒரு அழுத்தம் இருந்தால்தானே இசையிலும் எதிரொலிக்கும். விஸ்வஜித் ஒடுக்கத்தில் ஒளிப்பதிவு செய்திருக்கிறார். படம் முழுவதுமே ‘ப்ளீச்’ ஆகி வெளிறிப் போயிருக்கிறது. அவரது ஒளிப்பதிவில் குற்றமா, அல்லது அதை கிரேடிங் செய்தவரது குற்றமா ?.

இடைவேளை வரை ஓரளவிற்குத் தாக்குப் பிடித்து ரசிக்க முடிகிறது. அதற்குப் பின்னால் ”என்னென்ன கதை சொல்றாங்க பாருங்க,” என களைப்படைய வைத்துவிடுகிறது.

எல்ஜிஎம் – எல்கேஜி

பேய் படம் என்றால் பயமுறுத்த வேண்டாம், சிரிக்க வைக்கலாம் என ‘தில்லுக்கு துட்டு’ படம் மூலம் சொல்லி வெற்றியும் பெற்றவர் சந்தானம். அந்த பார்முலாவை இந்த மூன்றாம் பாகத்திலும் பாலோ செய்து ரசிக்க வைத்திருக்கிறார். ‘டிடி ரிட்டன்ஸ்’ அதன் மூன்றாம் பாகம்தான் என படத்திலேயே சொல்லிவிட்டார் சந்தானம்.

முந்தைய படங்களில் வழக்கமான சந்தானத்தைப் பார்க்க முடியாமல் போக இந்தப் படத்தில் அவரை மீண்டு(ம்) அழைத்துக் கொண்டு வந்திருக்கிறார் இயக்குனர் பிரேம் ஆனந்த். எந்த அவதூறும் இன்றி தான் மட்டும் நகைச்சுவை செய்யாமல் மற்றவர்களையும் சுவை குன்றாமல் செய்ய வைத்திருக்கிறார் சந்தானம்.

புதுச்சேரியில் ஒயின் ஷாப்களின் ஓனராக இருப்பவர் பெப்ஸி விஜயன். அவரது வீட்டில் பிபின் தலைமையிலான கூட்டம் ஒன்று கொள்ளையடிக்க திட்டமிடுகிறது. அவர்கள் கொள்ளையடித்த பணம் மற்றொரு கூட்டமான மொட்டை ராஜேந்திரனிடம் கைமாறி பின்னர் சந்தானத்திடம் வந்து சேர்கிறது. அந்தப் பணத்தை ஊருக்கு வெளியே ஒரு காட்டு பங்களாவில் மறைத்து வைக்கிறார்கள் சந்தானத்தின் நண்பர்கள்.

அது பற்றி தெரிய வந்த விஜயன், சந்தானத்தின் காதலி சுரபியைக் கடத்தி வைத்து அவரது பணத்தைக் கொண்டு வந்து தரச் சொல்கிறார்கள். அந்த காட்டு பங்களாவிற்குள் செல்லும் சந்தானமும், அவரது நண்பர்களும் அங்குள்ள பேய்களிடம் மாட்டிக் கொள்கிறார்கள். ஒரு சூதாட்ட கேமில் வெற்றி பெற்றால் மட்டுமே வெளியே போக முடியும் என பேய்க் குடும்பத்துத் தலைவன் பிரதீப் ராவத் சொல்ல, சந்தானம் என்ன செய்கிறார் என்பதுதான் படத்தின் மீதிக் கதை.

படத்தின் ஆரம்பத்திலேயே காமெடிக்கும், கலகலப்புக்கும் பஞ்சமிருக்காது என புரிய வைத்துவிடுகிறார்கள். அதை கடைசியில் கிளைமாக்ஸ் வரை திரைக்கதையில் காப்பாற்றியிருக்கிறார் இயக்குனர் பிரேம் ஆனந்த். பணத்தைக் கொள்ளையடிப்பதும், அது ஒருவர் மாறி மற்றொருவரிடம் சென்று பேய் பங்களா வரை போவதையும் லாஜிக்காகவே யோசித்திருக்கிறார்கள். அதன்பின் பேய்களின் ஆட்டம் என்பதால் நோ லாஜிக், ஒன்லி காமெடி மேஜிக் தான்.

தோற்றத்திலும், நகைச்சுவையிலும் பழைய பார்முக்கு நன்றாகவே ரிட்டர்ன் ஆகிவிட்டார் சந்தானம். அவரிடமிருந்து ரசிகர்கள் எதிர்பார்ப்பது இதைத்தான் என்பதைப் புரிந்து கொண்டால் நல்லது. அப்படி நடந்து கொண்டால் டிடி ஆகவோ அல்லது பணமாகவோ அவருக்கு வந்து சேரும் என்பது உறுதி. ஹீரோ என்றால் எப்படியும் கடைசியில் வெற்றி பெற்றுவிடுவார் என்று தெரிந்தாலும் பேய் பங்களாவில் அவர் ஆடும் அந்த ‘கேம் ஷோ’ தான் படத்தின் ‘ஷோ ஸ்டாப்பர்’.

சந்தானத்திற்கு ஒரு ஜோடி இருக்க வேண்டும் என்பதற்காக கதாநாயகியாக சுரபி. சந்தானம்தான் கதாநாயகன் என்றாலும் படத்தில் நடித்துள்ள ஒவ்வொருவருக்குமே முக்கியத்துவம் வரும்படி காட்சிகளை அமைத்திருக்கிறார்கள். சந்தானத்தின் நண்பர்களாக மாறன், சேது. இந்தப் படத்திலும் மாறனின் டைமிங் வசனங்கள், டிரெண்டிங் வசனங்களாக அமைந்து ரசிக்க வைக்கிறது.

பிபின் தலைமையில் முனிஷ்காந்த் உள்ளிட்டவர்களின் கொள்ளை கூட்டம், மொட்ட ராஜேந்திரன் தலைமையில் தங்கதுரை உள்ளிட்டவர்களின் மற்றுமொரு கொள்ளை கூட்டம். வில்லன் பெப்ஸி விஜயனின் மகனான ரெடின் கிங்ஸ்லி, அடியாளாக தீனா. இவர்களும் ஆரம்பத்திலிருந்தே ஒருவரை ஒருவர் துரத்தித் துரத்தி, பேய் பங்களாவிற்குள் ஓடியோடி நம்மையும் சிரிக்க வைக்கிறார்கள்.

பேய் பங்களாவில் சூதாட்ட கேம் ஷோ நடத்தும் பிரதீப் ராவத், அவரது குடும்பத்தைச் சேர்ந்த மசூம் சங்கர், மானஸ்வி ஆகியோரும் பேய்களாக மிரட்டியுள்ளார்கள்.

புதுச்சேரியின் தெருக்கள், அந்த பேய் பங்களா என ஒளிப்பதிவாளர் தீப் குமார் பதி கதாபாத்திரங்களுடன் ஓடியாடி ஒளிப்திவு செய்திருக்கிறார். ஆப்ரோ இசையில் பின்னணி இசை பக்கபலமாய் அமைந்துள்ளது.

பேய் பங்களாவின் விஎப்எக்ஸ் காட்சிகளை இன்னும் தரமாக அமைத்திருக்கலாம். இடைவேளைக்குப் பின் சில காட்சிகளின் நீளத்தைச் சிறிது குறைத்திருக்கலாம். மற்றபடி நேரம் கடந்து போவதே தெரியவில்லை.

டிடி ரிட்டன்ஸ் – திருப்பித் தரும்… துட்டு.. துட்டு..